Friday, June 24, 2011

ඔබ විඳිමි.....

ඹබේ පිට පොත්ත රතුය...
මට ආසාවේ බැරිය...
හෙමි හෙමින් ගලවා දමමි එය...
නුඹට නොරිදෙන්නට...
රිදුනත්, රිදෙන තැන්..
සිප ගනිමි මුදු ලෙසින්..
එක එක මුදන කල්හී..
වසා සිටි පිට සේල..
මතුවෙයි ඔබේ නියම රැව..
අපූරැයි නොවැ එය හරිම..
ලෙවකමි පලමු කොට..
ඔබ හොඳින් තෙත් වෙන්න..
හපන්නට හිතේ මට..
ඒත් ලෝබයි..
නැතිවෙයි යයි බියෙන්..
ඔබේ ඔය සොඳුරැ බව..
උරන විට රස තදින්..
ගලයි රස පැන්..
කටේ දෙපසින්..
තව තවත් ලෙව කමි..
දමා කට ඇතුලටම..
දැනෙයි සියුම් කෙඳි කෙඳි...
උගුරටම යන විදිය..
දැන්නම් ඉවසුවා ඇතිය..
හපන්නට අවැසිමයි..
ඉවරයක් වෙන්නම..
අතාරින්නෙම නැහැ..
කිසිම කොටසක්..
සුප්පන්නේ නැතිව..
සියල්ල අවසන්ව..
ලෙවකම් ඔබෙ ඇටය..
පාට සුදු වෙනකන්ම..
විසිකරන්නෙම නැහැ ඔබව..
හිටවමි මම වැටේ..
ඔබෙ නමද අපුරැය..
හරියටම ඔබ වාගේ..
මුමුනමි ඔබේ නම..
කර්තකොළොම්ඹු යැයි සෙමින්..

Monday, June 20, 2011

විත්තිකරැ මම වෙම්..

නුඹේ අධිකරණය..
විත්තිකරැවෙකු කොට මා නැවතත්..
නීති සහයක් නැතිවම...
නිදහසට කිසිත් නොකියම..
නිහඬවම සිටිමි මම...

නුඹට ඇති පෙම නිසා මා සිත..
රිද්දන්න බැරි නිසා නුඹේ මුදු වත..
දකිනු බැරි නිසා  කඳුළු ඔය නෙත.
ඉතින් මා එල්ලන්න..
නුඹට පෙම් කල වරදට..

ඉස්කෝලෙ යනකොට..
පොත් අරන් දුන්න වරදට..
නුඹව රැක ගත්තට..
ඉතින් මා එල්ලන්න..
නුඹට පෙම් කල වරදට..


වරිච්චි බිත්ති.. පොල් අතු හෙවිල්ලපු..
නුඹේ පැලට.. ගොඩවුනු..
වරදට, නුඹව අත් නෑරපු..
ඉතින් මා එල්ලන්න..
නුඹට පෙම් කල වරදට..

Sunday, June 19, 2011

තාත්තලාගේ දිනයේදී..තාත්තෙක් ගෙන් තාත්තෙක් ට....

වට කරගෙන පරපුරම..
සරොම් පහයි..
කමිස තුනයි...
ඇඳ උඩ තෑගි මළු ගොඩයි..
ඒත්...
මුණබුරන්ගේ කථාව..
මිණිබිරීගේ හිනාව...
අද විතරයිනේ කියලා හිතෙනකොට..
දාගෙන යනවා මුළු පපුවම...
හෙට ඉඳන් ආයෙමත්..
පුරැදු බංකුව උඩ...
අඳුරන මුනක් ගේට්ටුව උඩින් පේනකන්..
බලාන ඉන්නවා අවුරැද්දම..
ඊලඟ තාත්තලගේ දවස එනකන්..
ලබන සැරේ එනකොට..
ජීවත් වෙලා හිටියොත්..
සරොම් කමිස නැතිව..
අරගෙන වරෙන්...
ආදරය පොඩි ගානකට..

Friday, June 17, 2011

පොලිස් කථා 1

කාලයක් මම මානව හිමිකම් සම්බන්ධ ආයතනයක වැඩකලා. සේවය කලේ වව්නියාව කාර්යාලයේ. ඒ කාලේ අපිට මානව හිමිකම් සම්බන්ධයෙන් පුදුමාකාර උණක් තිබුනේ. ඒ කාලේ නිතරම පොලිසිය, යුධ හමුදාව සමග වැඩ කලා. ඔය කාලේ මං වව්නියාවේ පොලිස් අධිකාරී කාර්යාල‍යෙන් පොලිස් නිලධාරීන් සඳහා පවත්වන පුහුණු වැඩසටහන් වල මානව හිමිකම් සම්බන්ධ භාහිර දේශකයෙක් විදියට සම්බන්ධවෙලා හිටියා. මේ අවස්ථා වලදී මං ගොඩක් වෙලාව උදාහරණ විදියට පාවිච්චි කරන්නේත් පොලිසිය සම්බන්ධ කථා තමයි. ඒවා ඉතාම රසවත් වගේම පස්සේ කල්පනා කරන්න දේ ගොඩක් ඉතිරි කරනවා.
මං හිතුවා ඒ පොලිස් කථා කීපයක් පල කරන්න..
මේක මීට අවුරැදු ගානකට කලින් මඩකලපුව පැත්තේ රාජකාරී කරපු පොලිස් අධිකාරීවරයෙකුට වෙච්ච සිද්ධියක්. දවසක් උදේ මෙතුමා රියදුරා එක්ක රාජකාරී සඳහා වාහනේ යනවලු. රියදුරා බොහොම මෑතකදි පොලිසියට බැඳුනු තරැණයෙක්ලු. මෙතුමා දැක්කලු රියදුරාගේ මුණ වැඩිය හොඳනැති ගතියක්. එතන ඉඳලා කථාව වෙච්ච විදියටම ලියන්නම්.
අධිකාරී - මොකද අයිසේ මූණේ හැටි.. ටිකක් හිනාවෙලා ඉන්නවකෝ උදේ පාන්දර.
රියදුරැ - නැහැ සර්..මේ ..මේ...
අධිකාරී - මොක්කද අයිසේ ගොත ගහන්නේ.. තමාසෙට මොනහරි ප්‍රශ්ණයක් තියෙනවද ?
රියදුරැ - පොඩි ප්‍රශ්ණයක් නම් තියනවා සර්.. ඒත් මේ...
අධිකාරී - කියනවා අයිසේ... කියනවා.. මොකක් ද?
රියදුරැ - මං ගෑණු ළමයෙක් එක්ක සම්බන්ධයක් තියනවා සර්.. දැන් ඒ ගෑණු ළමයා කියනවා අම්මලා   තාත්තලා වෙන කෙනෙක්ව හොයනවළු බන්ඳලා දෙන්න.
අධිකාරී - අපෝ ඕක මොකක්ද අයිසේ... තමුසේ මහ බය ගුල්ලේක්නේ.. කෙලින්ම ගිහින් අහනවා.
රියදුරැ -  අනේ බයයි සර්.. ඒගොල්ලෝ හරි සල්ලිකරයෝ.. තාත්තා හරිම වසයිළු..
අධිකාරී - අනේ ඕයි.. තමුසේ පොලිසියේ කියලා කියන්නත් ලැජ්ජයි. එහෙම මොනාහරි උනොත් කේස් එකක් දාලා තාත්තව ගන්නවා ඇතුලට.. දෙක තුනක් දෙනකොට නිකම්ම කැමති වෙයි.. තමුසේ බය නැතිව ඉන්නවා.. මොනාහරි උනොත් මං ඉන්නවානේ..
රියදුරැ - අනේ බොහොම ස්තූතියි සර්.. මං ගෑණු ළමයට කියන්නම් සර්..
අධිකාරී - හරි.. හරි.. දැන් ඉස්සරහා බලාගෙන එළවනවා.

සති කීපයකට පසු..
අධිකාරී - මොකද තමුසේ අදත් මූණ එල්ලගෙන.. කෙල්ල මොකද කියන්නේ.
රියදුරැ - වැඩක් නැහැ සර්..මාගේ ජීවිතෙත් එපා වෙලා තියෙන්නේ දැන්.. කෙල්ල කියනවා ඉක්මනට මොනාහරි නොකොලොත් එයා ගැන අදහස අතඇරගන්න වෙයිළු.
අධිකාරී - ඉතිං තමුසේ මොකද කිව්වේ..
රියදුරැ - මං මොනවා කියන්න ද සර් ?
අධිකාරී - කොන්ඳ කෙලින් වැඩකරනවා.. පිරිමියෙක් වගේ.. කෙල්ල අඩු වයසද ? , කෙල්ල තමුසෙට ආදරේද ?
රියදුරැ - වයස හරි සර්, ඕව් සර්...එයා මට ගොඩක් ආදරෙයි...
අධිකාරී - තමුසේ...?
රියදුරැ - ඔව් සර්... එයා මගේ පන... මං මගේ ජීවිතේටත් වැඩිය එයාට ආදරෙයි..
අධිකාරී - එහෙනම් මොන් මගුලද ඕයි තවත් බලාගෙන ඉනනේ.. තාත්තටයි අම්මටයි බමිබු ගහගන්න කියලා උස්සගෙන යනවා ඕයි... මොනාහරි උනොත් මං බලාගන්නම්.. තමුසෙට ඕනේ නම් මං ට්‍රාන්සර් එකකුත් හදලා දෙන්නම්.
රියදුරැ - කමක් නැද්ද සර්..
අධිකාරී - කමක් නැයැ ඕයි ... උස්සගෙන යනවා... තමුසේ වගේ පොලිස් කාරයෙක්..
දින කීපයකට පසු පොලිස් අධිකාරීවරයාගේ විසි දෙහැවිරිදි දියණිය අතුරැදහන් වී ඇති අතර ඇය විසින් ලියා තබන ලද ලිපියක සඳහන් තමා සිය පියා විසින් තම පෙම්වතාට දෙන ලද උපදෙස් මත මෙම තිරණය ගත් බවයි. අදාල පොලිස් අධිකාරීවරයා විශ්‍රම යනතෙක්ම රියදුරෙකු යොදා නොගන්නා ලදී.

Thursday, June 16, 2011

මාතෘකාවක් නැත......

පොලිස් රෝහල,
නාරාහේන්පිට.

මද්දු නංගිට  ලියමි,

දැන් උඹට කොහොමද? මට නම් ඒ හැටි සුවයක් නැහැ තාම. දොස්තරලා කියනවා කළු ඉංගිරියාව පුපුරලා කියලා. ඒක හොඳටම සනීප වෙන්න තව අවුරැද්දක්වත් යයිලු. සමහර විට ඊටත් වඩා වැඩි කාලයක්. මට අවුරැද්දක කාළයකට පඩි රහිත නිවාඩු අනුමත කලා කියලා ඕඅයිසී මහත්තයා පණිවිඩයක් එවලා තිබුනා.
උඹගේ කකුල තාම රිදෙනවද ? ලොක්කයියා උඹව බලලා කෙලින්ම ආවේ මාව බලන්න. ඌ මට විස්තරේ කිව්වා. උඹගෙත් දනිස් පොල්කට්ට පුපුරලලු. මාස හය හතක් යනකම් ඉතින් මැසින් පාගලා ඉවරයි තියලා කිවිවා. උඹලටත් කටවල් පුකවල් වහගෙන ඉන්න බැහැනේ. ගියා දෑවැද්ද ආරස්සා කරගන්න. දැන් හොදෙයි වෙච්ච දේ.
උඹලාගේ එකෙක් ගහපු  ගල්පාර කෙලින්ම වැදුනේ වම් ඇහැට. මාව තුංකුදුරැස් වෙලා ගියා බං. මට ආරංචියි උඹට ගහපු එක ටීවී එකේ ගියාට පස්සේ ඒ ගහපු එකාව ඇල්ලුවලු. බලනකොට ඌ අල්ලපු ගමේ එකෙක්. මාත් එක්කමයි ගාමාරක්ෂකේට ට්‍රේනින් ගියේ. ඌ මෙලෝ මගුලක් දන්නේ නැහැලු. දවස් තුනක් ඕඅයිසී මහත්තයාගේ වත්ත මුරකරලා ඇවිත් නිදියං ඉදලා තියෙන්නේ.  එක පාරටම සාජන් මහත්තයෙක් බැරැක්කෙට ඇවිල්ලා කෑගැහැව්වලු.. පොන්න වේ... ගේ පුතාලා නිදිවදිනවා..අරෙහෙ අපේ එව්වන්ට ගහනවා කියලා. ඒ කේන්තියට තමයි ඌ අහුවෙන ඔක්කොටම නෙලලා තියෙන්නේ. ඌගෙත් රස්සාව ගහලා යයි මයෙහිතේ.
පාඩුව වෙන්නේ හිච්චිට ඒකිගේ අද්දියාපනේ කඩාකප්පල් වෙයි කියලයි මට බය. උසස් පෙළටත් තව අවුරැදු දෙකක්ම තියනවනේ. ගමට ගිහින් අඳ කුඹුරක් වත් හොයාගන්න පුළුවන් වෙයිද කියලා දන්නෑ.එක ඇහැකින් වැඩකරන්න පුරැදු වෙන්න ඕනි දැන්.ලියන කොට උනත් හරිම අමාරැයි. .
ලබන සතියේ විතර ටිකට් කපයි මයෙ හිතේ. එයෙම උනොත් ගමේ යමු.
මං නවතිමි,

උඹට ජයසිරිමා හාමුදුරැවන්ගේ පිහිටයි,

පොඩි අයියා

ප.ලි - ගමේ එනකොට වෙනිවැල්ගැට හැළියක් තම්බලා තියන්න කියන්න කියලා අම්මට කියන්නම්. උඹ එන දවසට ටිකක් වේලහා වරෙන් පිටකොටුවට. නැත්තං කහටගස්දිගිලියේන් අන්තිම බස් එක අල්ලගන්න බැරිවෙයි.

Tuesday, June 14, 2011

ජීවිතය හැරී බලමි

                                                                                                    දෙවැනි පැටළුම

කඳුළු කැට දෙකක් සටස් ගාලා එළියට පැන්නේ ඉස්මොල්ලේ ගිය නිසා ද එහෙමත් නැත්නම් දැක්ක දේ නිසා ද කියලා හරියටම කියන්න බැරි උනත් වැටෙන්න නොදී හංගගත්තේ අක්කා පෙන්නේ නැති වෙන්න.
“මට තව සිගරට් එකක්“...  අක්කා මගේ දිහාට හැරැනා... මොකද අද කවදාවත් නැතුව......මං හිනා උනා...
මට පිස්සු,.... මං මටම කොඳුර ගත්තා... මං මොකද කාගේවත් කෙල්ලෙක් ගැන තැවෙන්නේ...එකම එක දවසක් විතරක් දැකපු... වචන 10 කට වඩා කථා නෙකරපු කෙල්ලෙක් ගැන ඇයි මං මේ තරං හිතන්නේ..
රේස් එකට ආපු කොටුව බස් එක අනුවයි එයාගේ කොල්ලවයි අරගෙන ඉගිල්ලුනා.... මහා මූසල පාලුවක් දැනුනා.. බුද්ධිය මොනවා කිව්වත්... හිත ඇතුලේ කියාලන්න බැරි මොකක්දෝ හැඟීමක්... සියුම් ඊරිසියාවක් දැනෙනවා..
අනූ.....  
බාගෙට බීපු සිගරට් එක බිම දාලා පෑගුවේ කේන්තියට ද දුකට ද දන්නේ නැහැ..
පාරෙන් පැනපු ගමන් අපු බස් එකේ එල්ලුනා... තුඩැල්ල එකයි.. මං කොන්ඳා අතට සල්ලි දුන්නා.
මං බස් එක ඇතුලේ හිටියට හිත පිස්සු බල්ලෙක් වගේ දුවනවා.
ඉස්සරහා බහිනවා..කොන්ඳා මගේ මුණ දිහා බැළුවේ මගින් බැස්සට සල්ලි නම් දෙන්නේ නැහැ වගේ බැල්මක්..
තියාගනින් උඹේ සල්ලි.. හැමදාම පුරැදුමේසේම වාඩි උනා..
ආ... ජානක මහත්තයා කාලෙකින් අපිව මතක් වෙලා තියෙන්නේ..
බියර් එකයි.. ගල් කාලයි... ඔම්ලට් එකයි.. ගොල්ඩ්ලීෆ් පහයි..
ඇයි මේ..... වීදුරැ දෙක තුනක් ඉවර වෙනකොට හැමදේම හරියයි.. මං හිතට බොරැවක් කිව්වා..
.................................................................................
“Good Morning” මිස්ටර් ජානක.... කියාගෙන අනූ කාමරේට ඇතුල්උනා.. “Good Morning” කොහොමද ඉතිං..
අපි දැක්කා ඊයේ අන්ධ ජෝඩුවක් යනවා bus halt එකේ දි..අනූගේ මුණ රතු උනා..
එයා හිනාවුනා මුකුත් නොවුන ගානට.. පොත අත්සන් කරලා යන්නම් කියාගෙන ගියා..
ආයිත් අර මූසල හැඟීම.. ඒ පාළුව ඉතිරි උනා කාමරය පුරාම..
මං ආයිත් හිර උනා ලිපිගොනුත් එක්ක.. වෙලාව ගියා දන්නෙම  නැහැ...
ජානක සර් මොනාද සැරින් සැරේ ඔළුව උස්ස උස්ස බලන්නේ... මාලි මැඩම්ටත් ඕනෙ නැති බම්බුවක් නැහැ.. මං මටම කියාගත්තා..
මුකුත් නැහැ මැඩම්.. මං හිනා උනා..
මට ඊයේ Production ටික ගේන්න..
මං file මිටියත් උස්සගෙන කාමරේට ගියා...
මං කාමරේට යනකොට මාලි මැඩම් phone තිබ්බා..
ජානක දැන් floor එක ටිකක් ඉක්මන් කරගන්න වෙනවා.. මොකද නැත්තම් අපිට වෙලාවට මේ order එන දෙන්න බැරිවෙයි...
Excuse me කියාගෙන අනූ ත් ඇතුල් උනා කාමරේට..
හිත ආයිත් නැවතුනා... මාලි මැඩම් මොන මොනවදෝ කියනවා.. එක දෙයක්වත් ඔළුවට වැටෙන්නේම නැහැ..
ජානක සර් අපි කවදද අනිත් order එක ලයින් එකට දාන්නේ..
ලබන සුමානේ විතර දාන්න පුළුවන් වෙයි මැඩම්.. එහෙම තමයි target හදලා තියෙන්නේ..
.................................................................................
ඔය විදියට දින සති මාස ගතවුනා..අපි ගොඩක් වෙලාවට එකට වැඩ කලා.. හොඳ යාළුවො උනා...
අපිට වෙලාව ලැබුනා කථාකරන්න... tea time එකේ දි  lunch time එකේ දි..
අපි බොහෝ දේවල් කථා කලා...campus එක ගැන... ඒ කාලේ කොයි තරම් සුන්දරද... අනු හරි ආසාවෙන් campus එකේ දි මුණ දීපු අත්දැකීම් ගැන අහගෙන හිටියා....


ඔයා දන්නවද අනූ ඒ කාලේ අපේ බැචෙක් හිටියා.. කෙල්ලෙක්.. හරියට ඔයා වගේමයි.. ඒකිට නම දාලා තිබ්බේ “යංකෝතකෝ“ කියලා... ඔයාටත් හැබැයි ඒ නම ගැලපෙනවා... බ්රේක් නැති කටින් එළියට පන්නා..

කිව්වට පස්සෙයි කියපු දේ බරපතලකම තේරැනේ..

ඇයි එයාට ජපන් කමක් දාලා තියෙන්නේ... එයා ජපන් කෙනෙක් වගේ ද..
මේකි tube light එකක්නේ.. මං යනවා... බායි... කියාගෙන මං කාමරේට ආවා...
මට තනියම හිනා... ඔයා හරිම නරකයි ජානක... මං තරහම තරහයි... අනූ මූණ රතු කරගෙන ඇවිත් කියලා ගියා..

එදා හවස තේ බොන්න ආවෙත් නැහැ....
මට සමාවෙන්න හිත රිද්දන්න හිතාගෙන එහෙම කිව්වා නෙමෙයි...
ඔයාට තේරෙන්නේ නැහැ ජානක... මං උඩින් හිනාවෙලා හිටියට හිත ඇතුලෙන් ගොඩක් වේදනා විඳින කෙනෙක්... අපේ ගෙදර අයත් හැමතිස්සෙම මගේ හිත පාරනවා.. මං ටිකක් හරි සතුටින් ඉන්නේ ඔයා එක්ක ඉන්න ටික වෙලාව විතරයි..මට මේවා කියන්න කව්රැවත්ම නැහැ..


මං තනිවෙච්ච කෙල්ලෙක්..


ඇයි රොහාන්..


එයා හරිම වෙනස් චරිතයක්... එයා මට වැඩිය අවුරැදු 15 ක් විතර වැඩිමල්.. එයාට මං බලාපොරොත්තු වෙන ආදරේ දෙන්න බැහැ... මං කැමතියි ජීවිතේ විඳින්න... විඳවන්න නෙමෙයි.. එයා මට ආදරෙයි.. ඒත් එක හරියට තාත්තා කෙනෙක් එයාගේ දුවට තියෙන ආදරේ වගේ.. මං බලාපොරොත්තු වෙන්නේ එහෙම ආදරයක් නෙමෙයි.. එයා නරක කෙනෙක් නෙමෙයි.. ඒත් එයා මගේ හිත හොයන කෙනා නෙමෙයි ජානක..
.
අනේ මංදා... මං මටම කියාගත්තා...


හීනි දුකකුත්... කාළකන්ණි සතුටකුත් හිතේ ඇතිවුනා....
අනූ ව මට අයිතිකරගන්න පුළුවන් වෙයි ද.......?

Saturday, June 11, 2011

නෑනා.....

බැළුවේ නුඹ දිහා...
හිනා උනේ අක්කා..
ඉඟි කලේ නුඹට..
හුරතලේ අක්කා..
කථා කලේ නුඹට...
ආවේ අක්කා..
ආදරේ කලේ නුඹට...
කසාද බැන්දේ අක්කා..

Tuesday, June 7, 2011

සිරිසඝබෝ........

සිරිසඝබෝ........


ඉස්සර වගේ මං එනතුරැ වැඩ          ඇරිලා
බලා ඉන්නේ නැහැ එනතුරැ දොර    ඇරලා
ආවත් ඇඳට මං “සැන්“ “පවුඩර්“        දාලා
අල්ලනවත් බැහැ ඔබ “කව්ළුව“       වහලා


නිදියයි කලින් ඔබ මගේ පැත්තට    හැරිලා
සමහරදාට නිදියයි සරමට              බැහැලා
දැන් නැහැ වගක් මං ගැන නිකමට    හිතලා
දැන් නිදියන්නේ බිත්තිය පැත්තය   හැරිලා


හීනෙන් වගේ මොනවද ඔබ     කොඳුරනවා
සිහින් හඬින් ඔබ කාවද               අමතනවා
ඔබ කෙඳිරිල්ල මගේ මතකෙට යලි   එනවා
ඔබෙ ඳැගලිල්ල සිහිවී ගත         පිබිදෙනවා


එනවිට දෙකක් දාගෙන පඩිදාට             මම
ඉන්නව බලාගෙන දොරකඩ ඔබ          තාම
ගස්සලා හොල්ලලා පෙන්නලා ලැම    නිතඹ
තාමත් පඩිය තියනවා මම ඔබ             අත ම


ඔබ සැක කරන්නට හිත ඉඩදෙන්නැති හින්දා
ඉස්සර වගෙම තවමත් ආදරේ              හින්දා
ඔබගේ සැපත මගේ සතුටම වන          හන්දා
කූඩුව අරිමි මම ඔහු හා යනු               කැන්ඳා

Sunday, June 5, 2011

ඔබ එනවානම්..
හීනයක් වෙලාවත්..
නොනිදන හදවතට..
මැවූ පෙම් හීන එළිවෙන්න..
පැතූ පෙම් පැතුම් ඉටුවෙන්න..
ඉඩ දෙන්න...
රාත්‍රියට තනිවෙන්න..
ජීවිතේ පුරාවට..
අනේ මට ඉඩ දෙන්න.
නිදියන්න..